Díli, 21 Juñu 2024 – Ajénsia Nasional ba Avaliasaun no Akreditasaun Akadémika (ANAAA) realiza atividade avaliasaun akreditasaun prográmatika tinan 2024 siklu daruak ba Departamentu Jestaun Informátika, Fakuldade Information and Communication Technology (ICT) iha Institute of Business (IOB).

ANAAA hanesan ajénsia autónomia ne’ebé tutela no superintendénsia husi Ministério do Ensino Superior, Ciência e Cultura, no ninia kna’ar mak atu garantia kualidade liu husi avaliasaun no akreditasaun akadémika ba estabelesimentu ensinu superior no siklu estudu sira iha Timor-Leste.

Atividade akreditasaun ne’e rasik la’o durante loron rua (2) hahú husi dia 21 to’o 22 Juñu 2024 ho ninia tarefa atividade sira hanesan: Enkontru entre Estrutura Reitoradu ho Ekipa ANAAA, Enkontru ho Xefe Departamentu, Dekanu Fakuldade, Ekipa internal Quality Assurance (IQA), Aprezentasaun ba Programa Estudu, Enkontru ho Dosente sira husi Programa Estudu, Enkontru ho Estudante Ativu no Alumni, enkontru ho Stakeholders (Employers, Networking partners, Alumni), Vizitasaun ba Fasilidade no Infraestrutura (Library, Laboratories, Lecturer room, facilities for student, classrooms).

Iha atividade enseramentu ho membru panelista sira, atividade ne’e taka ho konfirmasaun enkontru ba lider programa estudu no IQA hodi halo aprezentasaun ba iha rekomendasaun husi Ekipa panelista ligadu ho programa estudu ne’e rasik no ikus liu taka ho asinatura ofisial ba relatoriu site visit.

Atividade ne’e rasik hetan partisipasaun no Abertura husi Vise-Reitor I, Vasio Sarmento Soares, S. Kom., M.T nu’udar reitor Interinu, Dekanu Fakuldade ha’at (4), Xefe Departamentu sira, Diretor Programa Mestradu, Diretor Sentru Peskiza no Servisu Komunitariu, Diretora Relasaun Externa no Dosente sira.