Dili, 03/06/2024 - Women and Youth Creating Our Future (WYCF) hahú rejista tan estudante foun ba etapa daruak iha tinan akademiku 2024. Sentru formasaun WYCF fornese kursu oioin hodi tulun foinsa'e sira hotu iha Timor-Leste no garantia produz formandu ho kualidade no susesu iha mundu kareira nian.

Atividade simu estudante foun WYCF Sentru IOB ne’e rasik halao iha edifísiu WYCF nian ne’ebé lokaliza iha Praia dos Coqueiros, Comoro, Díli no Kampus IOB Holsa Maliana. Atividade ne’e rasik hahú husi tuku 08:00 am - 17:00 pm.

Sentru formasaun ne’e, fornese kursu oioin hodi kapasita foinsa’e sira iha área sira hanesan:

1. Emprego – Kompostu husi kursu lubun ida mak hanesan: ICT (Networking, Operating System no Pakote Office), Hospitalidade (Resepsionista, Atendementu Kliente no kulinaria), Kontabilidade (Aplikasaun MYYOB, Asset, Laiability no transaksaun prosesu finansas), Jestaun Eskritóriu (Sekretariu, komunikasaun, jestaun no relatóriu). Kursu ba abilidade ida ne’e sei hala’o durante fulan 2, estájiu fulan 2 no presu rejistrasaun ho montante $5.00 (dolar lima);
2. Empreendedorizmu – Kursu ne’ebé oferese mak hanesan Digital no Deseñu Gráfiku (Corel Draw, adobe Photoshop, adobe primere Pro), Jestaun Negósiu (emprendedorizmu Business CANVAS, Planu Negosio), Eletroniku (capsitor, diode reparasaun TV, Reparasaun Speaker, instalasaun Básico no instalasaun Residensia), Konstrusaun Civil (Auto Cad 2D, sketsUp no BOB). Kursu ne’e sei hala’o ho maneira kursu fulan 2, estájiu fulan 2, no presu rejistrasaun ho montante $5.00 (dolar lima);
3. Dezenvolvimentu Profisionál Kareira Servisu – Iha área ida ne’e oferese kursu 3 ne’ebé úniku ho kursu sira seluk. Tamba iha kursu ida ne’e sei foka liu ba abilidade profisionál hanesan hakerek CV, hakerek karta aplikasaun no abilidade ba entrevista servisu ruma. Durasaun ba kursu ne’e sei halao de’it fulan 1 ho kustu $10.00 (dolar sanulu);
4. Língua – WYCF oferese kursu 3 mak hanesan: Inglés (general no seasonal work program) no Portugés. Kursu ne’e sei hala’o durante fulan 4 ho kustu $5.00 (dolar lima).

WYCF Sentru IOB ne’e rasik loke iha fatin 3 mak hanesan Díli, Maliana no Baucau. Iha rejistrasaun etapa II ne’e, Díli no Maliana mak halao ho data inskrisaun hanesan. Iha loron primeiru rejistrasaun tantu Díli no Maliana hetan númeru estudante boot tebes iha kursu sira ne’e.

Tanba ne’e, WYCF prontu kapasita imi no ho fiar ne’ebé foinsa’e sira fo WYCF Sentru IOB (Dili, Maliana no Baucau) WYCF iha komitmentu forte atu oferese kursu ne’ebe di’ak no inovativu kada tinan, ho nune’e bele prodús foinsa’e sira ho abilidade di’ak iha merkadu servisu.