Pedro Miguel de Fatima Goncalves Barreto Ximenes (Tuir mai temin de’it DR. Pedro Ximenes), moris iha loron 25 fulan Maio tinan 1976 iha Dili. DR. Pedro Ximenes nu’udar oan mane boot husi Abel da Costa Freitas Ximenes “Larisina” no Laurinda Guterres Barreto Ximenes. Agora ho idade 45. Kaben ho Claudina de Jesus Conceicao Alves Ximenes no iha oan Feto ida naran Natasha de Jesus Amaral Ximenes agora ho idade tinan 14.

Iha Perkursu edukasaun formál, Dr. Pedro Ximenes hahú iha Eskola Báziku Misaun Katólika Baucau, iha tinan 1980. Iha momentu ne’ebá kadernu no lapis laiha no ema hotu tenke aprende tur iha rai. Iha tinan 1983 muda fali mai Dili no akaba eskola báziku iha SDN 7 Komoro. Kontinua nia ensinu pre-sekundaria iha SMP São Pedro Dili, depois muda ba SMP São Paulo VI no akaba iha tinan 1990. Kontinua fali ensinu sekundariu iha SMA Kolese Santo Yusuf Malang no akaba iha tinan 1993. 

Iha nivel edukasaun superior, Dr. Pedro Ximenes hahú nia estudu iha Institut Teknologi Nasional (ITN) Malang iha area Elektronika no kensege akaba ninia lisensiatura iha tinan 2003. Iha tinan 2005 Kontinua estudu ba nivel Mestradu iha Universitas Katolik Parahyangan Bandung no akaba iha tinan 2007 ho predikadu “Suma Cum Laude” iha Area Jestaun Finanseira.

Iha Tinan 2011, Dr. Pedro Ximenes kontinua estudu nivel doutoramentu iha Flinders University Austrália hafoin hetan bolsa Estudu ne’ebé oferese husi Governu Australia (ADS), iha area Edukasaun. Iha tinan 2015 konsege finaliza nia estudu no hetan titulu “Doctor of Education” husi Flinders University. Alende formasaun akadémiku formal, Dr. Pedro Ximenes mós partisipa iha kursu formasaun Nivel IV iha area Teknolójia no komunikasaun iha Portugál, Lisboa durante tinan 2 husi 2001-2002.

Iha esperénsia organizasionál, Dr. Pedro Ximenes mós hanesan membru ativu husi organizasaun Resistência Nacional de Estudantes Timor-Leste ka “RENETIL” husi “UNER Lalika“Malang. Iha tinan 1997-1999, hetan mós fiar hanesan Ketua Ikatan Mahasiswa Timor-Timur (IMPETIMUR) iha Malang. Durante periódu preparasaun ba referendum, Dr. Pedro Ximenes hamutuk ho ninia kompañeru seluk husi RENETIL no IMPETTU organiza no sai hanesan Jornalista ba Radio Rezisténsia “Radio Maubere Lian”.

Iha kareirra profesionál, Dr. Pedro Ximenes hahú hanesan traballadór “fokit manu fulun” iha Inglatera iha tinan 2002. Iha tinan 2003 kontinua servisu ba Fundação Klibur Mata Dalan/IOB to’o agora. Desde Tinan 2003, Dr. Pedro Ximenes servisu mós iha institutisaun no organizasaun seluk mak hanesan Timor Telecom, no iha tinan 2010 to’o 2011 serbisu Iha NCAAA (agora bolu ANAAA)..

Iha tinan 2012-2015 servisu hanesan Funsiunariu Apoia Plataforma aprendizajen on-line no Biblioteka iha Flinders University Australia. iha tinan 2016-2017 servisu mós iha World Bank hanesan Konsultór. Iha tinan 2016-2019 sai hanesan membru Konsello Diresaun ANAAA, nu’udar peritu Nasionál. Agora daudaun Dr. Pedro Ximenes servisu iha Fundação Klibur Mata Dalan/IOB, no sai mós hanesan konsultór ba Programa HANDS iha Ministerio Edukasaun no okasionalmente sai hanesan membru painel avaliasaun ba ANAAA*