Díli, 06 Marsu 2024 - Institute of Business (IOB) realiza serimónia Bina Familiar hodi festeza susesu orientasaun estudante foun tinan akadémiku 2024. Atividade orientasaun estudante foun realiza ona durante loron tolu hahú iha 6-8 Marsu, tinan ne’e.

Iha serimónia ne’e, IOB atribui ofisialmente sertifikadu orientasaun ba estudante foun sira no Komisaun Organizadora ba susesu realizasaun atividade orientasaun ne’e.

Leonildo Freitas, Vise-Prezidente Konsellu Estudantil hato’o nia agradesimentu ba parte hotu ne’ebé fó ona apoiu no kontribuisaun hodi realiza atividade orientasaun ba estudante foun. Nia hatutan, “Orgullu ho estudante foun sira ne’ebe hatudu ona ezemplu di’ak tebes hodi kolabora ho komisaun organizadora to’o finaliza atividade importante ida-ne’e ho susesu”.

Iha Bina Familiar ne’e, Reitór IOB Dr. Pedro Ximenes, apresia no parabeniza Komisaun Organizadora ne’ebé dedika sira-nia an tomak hodi organiza atividade ne’e husi inísiu to’o remata. “Husu ba estudante foun sira, presiza estuda makaas no badinas aprende nune’e bele atinje imi-nia mehi ne’ebé iha. IOB prontu suporta imi liuhusi fornese edukasaun ho kualidade hodi prodúz graduadu sira ho kualidade mós” reitór hakotu.

Iha eventu ne’e, partisipa husi estrutura reitoradu, CEO Fundasaun Klibur Mata Dalan, Dekanu Fakuldade sira, Korpu dosente, no staff IOB tomak iha salaun IOB Plaza.