Díli, 6 Marsu 2024 – Institute of Business (IOB) realiza atividade orientasaun tinan akadémika 2024 ba estudante foun sira hamutuk 805 iha Kampus C, Fomentu II.

Orientasaun hanesan atividade prinsipál ne’ebe realiza molok inisia prosesu aprendijazen liuliu ba estudante foun sira. Atividade ne’e hahú ho ensaiu loron 2 hafoin kontinua ba orientasaun ne’ebe sei la’o durante loron 3. Iha orientasaun ne’e, partisipante sira kompostu husi fakuldade 4 mak hanesan: ICT, Ekonomia, Turismu, no Enjeñaria.

Reitór IOB, Dr. Pedro Barreto Ximenes ofisialmente halo abertura ba realizasaun atividade orientasaun iha loron Kuarta semana ne’e. “Ohin, orientasaun ba tinan akadémika 2024 hahú,” tenik reitór.

Reitór IOB, apresia mós ba estudante foun sira tanba hili ona IOB hodi sai hanesan sira-nia fatin hodi aprende. “Agradese tebes ba imi hotu ne’ebe hili ona IOB, tanba IOB hetan akreditasaun institusionál ho valor A. Ita boot sira la hili sala fatin no imi nia desizaun ne’e loos no rasional.” Nia hatutan.

Dr. Pedro Ximenes mós afirma, atu estudante foun sira aproveita didi’ak atividade orientasaun ne’e hodi komprende sistema akadémika atu fasilita sira iha prosesu aprendizajen.

Iha abertura ne’e, partisipa mós husi CEO Fundasaun Klibur Matadalan ho estrutura tomak, estrutura reitoradu, autoridade lokál suco Comoro, dekanu fakuldade, xefe departamentu, no korpu dosente IOB.

Tuir observasaun média ICT-Center, estudante foun sira kontente tebes partisipa iha atividade ne’e. Maske ambiente foun, maibe sira adapta-an ho lais no ativu tebes hodi tuir orientasaun tinan akadémiku 2024.