Díli, 30 Novembro 2023 – Institute of Business (IOB) realiza semináriu internal ba estudante ativu IOB hodi eleva koñesimentu iha área empreendedorizmu ne’ebe fasilita husi oradór Josh Vieira, fundadór Kompaña LatinGate, iha Salaun IOB Plaza, Fomentu II.

Atu hahú semináriu ne’e, Vise Reitór I, Asuntu Akadémiku, Sr. Vasio Sarmento Soares hateten, estudante sira presiza atensaun no tenke ativu durante semináriu ne’e. Atu nune’e, bele hasa’e imi nia koñesimentu hodi transforma imi nia hanoin sai empreendedór ida di’ak, matenek no ho responsabilidade.

Oradór prinsipál ba semináriu ne’e, Sr. Josh Vieira, iha nia aprezentasaun hateten, importante tebes ba emprendedór ida presiza hatene no konsiente nia iha ne’ebe hela “where he or she is right now”. “Atu hahú negósiu ida, tenke prontu hola desizaun, barani foti risku, no responsabiliza ba asaun ne’ebe ita halo.” Nia hatutan.

“Koalia kona ba oportunidade, hanesan rusa fuik ne’ebe halai ho lais. Tan ne’e, ohin hau hakarak fanu imi hodi barani foti desizaun, foti risku no ho responsabilidade. Treina an atu buka oportunidade ne’ebe naksubar no aproveita tempu joven buka aprende buat barak. Ho ida ne’e, imi sei preparadu no prontu ba futuru ne’ebe hahú ohin.” Nia hakotu.

Durante aprezentasaun, partisipante sira orgullu tebes hodi halo interasaun ba malu liu husi atividade diskusaun grupu, husu no hatan, no fahe perspetiva pesoál relasiona ho tema ba semináriu ne’e.